دادوه‌رى و هه‌ق وتن :

ئه‌ندازیار عوسمان.....له‌ئایه‌تى (135) سوره‌تى(النساء) دا جارێکى دیکه‌ باسى دادپه‌روه‌رى و هه‌ق بێژى ده‌کات و ده‌فه‌رموێت : [ يا ايها الذين امنوا كونوا قوامين بالقسط شهداء لله ولو على أنفسكم أو الوالدين و الاقربين ، ان يكن غنياً أو فقيراً فالله أولى بهما ، فلاتتبعوا الهوى أن تعدلوا ، وان تلووا أو تُعرضوا فان الله كان بما تعملون خبيراً ] واته‌ : ئه‌ى که‌سانێک که‌ بڕواتان هێناوه‌ هه‌میشه‌ به‌رده‌وام و پایه‌داربن له‌سه‌ر دادپه‌روه‌رى و شایه‌ت بن بۆ خوا له‌سه‌ر هه‌ق ، هه‌ر چه‌ند ئه‌وشایه‌تى دانه‌ زیانى خۆتان یان دایک و باوکتان ، یان خزم و خوێشتانى تیابێت ، جا ئه‌و که‌سه‌ى شایه‌تىیه‌که‌ى له‌سه‌ر ده‌درێت ده‌وڵه‌مه‌ند بێت یان هه‌ژار ، ئێوه‌ له‌هه‌ق و راستى لامه‌ده‌ن بۆ که‌سیان ، چونکه‌ په‌روه‌ردگار له‌پێشتره‌ و نزیکتره‌ بۆ چاو دێرى ئه‌وانه‌ له‌ئێوه‌ ــ واته‌ مه‌ڵێن : ئه‌و که‌سه‌ هه‌ژاره‌ با ئێمه‌ لایه‌نى ئه‌و بگرین ، چونکه‌ جارى وا هه‌یه‌ هه‌قى ده‌وڵه‌مه‌نده‌که‌یه‌ ، وه‌یان مه‌ڵێن ئه‌و که‌سه‌ ده‌وڵه‌مه‌نده‌ با ئێمه‌ لایه‌نى ئه‌و بگرین چونکه‌ جارى وا هه‌یه‌ هه‌قى هه‌ژاره‌که‌یه‌ ، که‌واته‌ هیچ شتێکى دنیایى نابێ کارتان تێبکات و له‌راست بێژى و شایه‌تى دانى هه‌ق لاتان بدات ، وه‌مه‌که‌ونه‌ شوێن هه‌واو ئاره‌زوو ، وه‌ له‌هه‌ق لامه‌ده‌ن ، جا ئه‌گه‌ر له‌هه‌ق لاتانداو رووتان وه‌رگێڕا ئه‌وه‌ خوا ئاگاداره‌ به‌وه‌ى که‌ده‌یکه‌ن … وه‌ هه‌موو که‌س ڕوو به‌ڕووى کار و کرده‌وه‌ى خۆى ده‌بێته‌وه‌ و پاداشتى خۆى وه‌رده‌گرێت .